कैसे रन्गै बनबारी...डा श्याम गुप्त.....

         कैसे रंगै बनबारी.....          

              ( घनाक्षरी छंद)

सोचि-सोचि राधे हारी, कैसे रन्गै वनबारी,

कोऊ तौ न रंग चढे, नीले अंग वारे हैं  |

बैजनी बैजंती माल,पीत पट कटि डारि,

ओठ लाल लाल, लाल,नैन रतनारे हैं  |

हरे बाँस वंशी हाथ, हाथन भरे गुलाल ,

प्रेम रंग सनो 'श्याम, केश कज़रारे हैं ||

केसर अबीर रोरी,रच्यो है विशाल भाल,

रंग रंगीलो तापै, मोर-मुकुट धारे हैं  ||

सखि ! कोऊ रंग डारौ, चढिहै न लालजू पै,

क्यों न चढ़े रंग, लाल , राधा रंग हारौ है |

सखि कहो नील-तनु , चाहे श्याम-घन सखि,

तन कौ है कारौ , पर मन कौ न कारौ है ||

राधाजू दुलारौ कहौ, जन जन प्यारौ कहो ,

रंग -रंगीलो  पर मन उजियारौ है  ||

ऐरी सखि ! जियरा के प्रीति रंग ढारि  देऊ ,

श्याम रंग न्यारो चढे , साँवरो नियारो है ||